Assalamualaikum dinakan2 semimon..

Beta aku nyia' nulis diom ling sama tu. Iyen abar banga dinakan mimon? Harapan ku alap2 jo semimon kiti ta' monggo2 jo temban. Jadi, mula ti serita ti elau tu diom blog tu pasal nasihat ti ta anak-anak remaja/bujang betiru. Sebagai pien yang tekito ti betiru keikoan peranak betiru pinemanja bana oleh iyang ko ema' gai. Sampai iko yang sanggup ngeloon iyang ko ema' gai ko' guru2 gai. Banga dinakan yang ni rahmati Allah swt, kasih sayang ta' banga anak dinakan eh penting. Bahkan eaa no yang si no'o diom agama. Tapi, iyen yang sebana-bana kasih sayang ti ta' banga anak2 ti atau adik2 ti?

Dinakan2 yang ni rahmat oleh Allah, ingot no kiti bahawa kasih sayang ti ta' anak dinakan ti iyono nagur gai amun muat silap, ngebana iyen yang salah, muan didikan agama/ilmu pengetahuan yang alap2 ko nurut kemauhan anak dinakan yang ingin belajar langa2 baya' ni sampai ta beta' telampau langa. Eaa no kasih sayang yang sebana ni. Selain eaa, kiti buli mupuk kasih sayang laman pergaulan ko' banga anak dinakan, beragam ko gai, kuri2/besukan somo2, mangan somo2 ko jadi contoh yang alap ta banga anak dinakan melalui laman tingkah laku ti yang alap2.

Sebab ea jomo mara' didikan mesti bermula laman ruma ti dau. Amun didikan laman ruma kurang atau raat, maka iyen yang bino'o pelua ta khalayak ulie anak2 akan raat. Maka amun anak2 melua akal raat ta banga jomo luar ea no binara keluarga ti raat. Kiti bongso sama tu memang terkenal ko semangat kebanian ni. Amun un jomo idaan atau bongso lain ta diom kawasan ti dong niraatan. Gaai pan somo jo manusia ko kiti. Amun kiti alap ta jomo, jomo pan alap ta kiti. Begea no sebalik ni.

Banga anak dinakan yang nirahmat oleh Allah, tujuan ku naip blog tu engko' kerna aku tu pandai atau telalu alap akhlak, cuma sayang ku ko bongso ku supaya nyia ni enda tena' ko supaya nyia ketembanan diom segala aspek ulie bongso alih. Nasihat tu pelua laman atai yang ikhlas, iyen yang bana ea, endo' ti ko amun un yang kasar atau raat ea timanan ti tio2. Kiti tu jomo sama ko beragama Islam bersatu no kiti ta diom kealapan ko' berdua no kiti ta Allah supaya bongso ko' negara ti tu aman damai bebas laman keraatan.